يا نار الحسود زيدي جمر

السلام عليكم

أغنية الحسد اغنية حلوة غنتها الراحلة ذكرى في رفاقة عمر

لما سمعتها اول مرة قلت ليش الانسان يحسد غيره ماهو كلنا عايشين زي بعض وكلنا بنادمية ؟؟؟؟
لكن في الفترة الاخيرة لقيت نفسي بصراحة محسدي و محسدي مخضرم في مجال الحسد او بمعنى أصح الحقد ,,,,,,, بصراحة خفت على روحي من الحالة اللي صارتلي ومشيت لدكتور أمراض نفسية وقتله:
يادكتور مش عارف ليش الفترة الأخيرة اصبح عندي شعور بالحقد والحسد عالناس ,,, تصور بمجرد ما انشوف حد عنده سيارة فارهة وخصوصا ادا كان الحد هذا نعرفه ونعرف ان مستوى دخله كان اقل مني بهلبة وفجأة اصبح زلياردير(يعني غادي من الملياردير) على طول انقول اشبح المنتف هذا ولى وصار منه وركب سيارة مليحة وينتابني شعور بالحسد والحقد وبعدها نوبة اكتئاب شديدة ,,,,وتصور يادكتور ,,,, قاطعني الدكتور وقاللي:
خلاص عرفت مشكلتك وعلاجك صعب ,,,,,, قتله خير يادكتور ,,,,, وكان جواب الدكتور :
المشكلة اللي عندك اسمها الحقد الطبقي ,,,,,سألت الدكتور ليش جتني توة وقبل مانعرفهاش
الدكتور: لان قبل الناس كلها يجيبولهم في سيارات زي بعضهم واقوى سيارة فيهم كانت كارولا 88 والناس كلها كانت تلبس من الشركة العامة للأسواق والناس كلها تأكل من استيراد المؤسسة الوطنية للسلع التموينية يعني بلادنا كلها كانت زي بعضها الوجوه فقط كانت تختلف
لكن اليوم اقل سيارة فيها اثنين ايرباج وام بي 3 كاسيت وتكييف والكماليات اللي انت عارفها (نسمع بيها مش نعرفها يادكتور)والناس بدت تلبس من ارقى المحلات اللي فتحت زي اللي كانو في شارع الجرابة مثلا(عرفت ليش يوم اللي هدو الجرابة فرحت ) والناس بدت تاكل في الكوك دور و مؤمن وتشكن كودج

قلت: باهي شن العلاج يادكتور
الدكتور :علاجك صعب لكن بنكتبهولك في وصفة وباش تحصلها انت وشطارتك

فعلا خديت الوصفة لكن لقيتها مكتوبة بالعربي وكانت عبارة عن نصائح هي :

باش تركب سيارة فارهة وتلبس من ارقى المحلات وتاكل في ارقى المطاعم يجب اتباع الاتي
1- ان تكون مسئول وبدون ضمير
2- ان تتميز في نهب الجهة التي انت مسئول عنها
3-ان تبني علاقات وطيدة مع امثالك من المسئوليين اتحقيق اكبر استفادة
4-ان تحلف انك لاتخلي اخضر ولا يابس في اي مكان يحطوك فيه بعد ما تشطب الجهة الاولى

بالله تقدرو تساعدوني باش انحصل الوصفة لان حالتي صعبة جدا
__________________

السلام عليكم
لاباس عليك ان شاء الله
خديت نسخة من الروشيتة
وكان قابلني الدواء في أي أمانة .... قصدي صيدلية تو نشريه

ان شاء الله لاباس

كل الود

مجموعة انسان